اصعب سؤال اللي جوابه للأسف مثله ســؤال
ما هو تفلسف الا موقف صار واسمع ثاني بيت
البارحه يومه سأل وش ذكرك ذيك الليال
كان الجواب بكل بساطه من متى اصلا نسيت
ادري بان جمع الصعوبه والبساطه شي محال
لكنها صارت كذا واللي اهم اني دريت
ان الحياه فبعد احبابك اذا جف الوصال
اتعيشها لو تقتنع انك خلاص اصبحت ميت
يا صاحبي لو كل شي يمر بالخاطر يقال
ما كانت العبره تولجني اليا منك طريت
شفني قدرت احبس دموعي بس دمع القاف سال
ويا كبرها ساكت ولكن داخل اوراقي بكيت
عمر الحكي ما كان دافي لابتدى بقولة تعال
لجل اتجاهل رجفة حروفي اليا مني حكيت
الحال في بعدك قسم بالله ما اسميه حـال
انوي على الضحكه واحس كلي خطا لاني نويت
اتصور انك من رحلت اشوفك لجسمي ظلال
لا شفته امشي ببتعد واثره معي مهما مشيت
مدام يعني في بحرك لفرحتي مليون جــال
وش فيه موجك ما ركد قربت اموت وما رسيت
يرضيك ما عادت معي تفرق اذا جالك مجال
لاني اقتنعت انك نهايه واني ببطي ما بـديـت
صرت اعقد حجاجي اذا جابوك باطراف الجدال
وانا قبل لاقالوا اسمك كني مـيـت ثم حـيـيـت
تعبت اعيش الدور وافتح للمعاذير الخيال
واتخيل اني جيت في بالك وبانك استحيت
وترد لي كلك وله وتقول كن البعد طـال
ومن الفرح ما عاتبك واقول ياخي مابغيت
حتى وانا تخيل حشمتك لن قلبي لا يزال
يكرر اسمك داخل اعماقي بنبضه لا سهيت
قلي شسوي فيك وانت بداخلي اصدق مثال
للحب واحساس القصيد ان عانق الليل وسريت
ربي يصبرني على الفرقا مدام الحظ مـال
وانت بيجيلك يوم تعرف ليه في بعدك شكيت
واذا بلاك الله وعذبك اشتياقك بس تعـال
واقرا القصايد في غيابك كلبوها بيت بـيـت
بتدرى ان اصعب سؤال اللي يجي رده سـؤال
لا قلت لي وش ذكرك ثم قلت لك متى نـسـيـت
محمد جارالله السهلي