يقول الأول كل مازم يهضم = الكل يرجع في مواقع نزوله
في دبرة اللي بالمخاليق يعلم =وماداج في وضح النهار وليوله
ربٍ على من تاب يغفر ويرحم= سبحان مفني دولةٍ عقب دوله
لا شفت آثار جدودنا صابني هم=ما ودي أشوفه ولا أدوج حوله
أهل الوفا والطيب والدين وشيم= راحو وخلو حقهم للي هوله
لاجاهم الجيعان يحشم ويكرم=يروح مسرور النبا مع ذلوله
هذي سلوم اجدودنا الضيف يحشم=خص الضعيف اللي ذلوله نعوله
وحنا بساقتهم عسى الله يرحم= الموت حق وكل نفسٍ تنوله
فيما مضى ياطول ما قلت ياعم = واليوم انا اللي صرت عم الحموله
بوصيك ياللي بالملازيم تهتم=عليك بالعليا طريق الرجوله
وقتٍ علينا زود الهم بالهم=في هالزمان اللي كثير ميوله
من طاوع المعبود يسعد ويسلم= يتبع طريق الرب ويتبع رسوله
وخمس الفرايض لازمه والشهر صم= من طاعة الله كل خيرٍ تنوله
بوصي عيالي كلهم لايمٍ لم= الله يقديهم على اللي نقوله
من رافق أهل الطيب ما يلحقه ذم= ملزوم تأخذ من سجايا فعوله
ومن رافق اللي دون يخسر ويندم=لابد ما يبلاك شرٍ تنوله
ولا يغرك سنحة الزول والجرم =ماهيب في جرمه ولا كبر زوله
مثل السراب اللي يغرك إلى زم= يزم لك وهو سيرع جفوله
ولا يغرك من بوجهك تبسم = حتى تميز غايته ومحصوله
لو شفت وجهه زين فالداخلي سم=له حقةٍ للغافلين محبوله
واوصيك ابن عمك إلى جار فاحلم = ادمح له الزلة وكرّم نزوله
واوصيك في جارك ترى الجار يكرم= قبل حديكم ترتحل به زموله
والوقت لو يسقيك من صافي الجم = لابد ما تشرب بواقي حثوله
وصلاة ربي عد من حج واحرم= على النبي اللي كريمة فعوله