أقول ياعاذلـي رح مالـك ومالـي
نفس الفتى ماتحب اللـي يعذربهـا
اناابخص الناس في حلي وترحالـي
النفس نفسي واعرف اشلون احاسبها
لضاق صدري وتاه من الغثـا بالـي
والارض ضاقت وضاقت بي مناكبها
نصيت لي مرقب في صحصح خالـي
في راس رجم تصافق بـي هبايبهـا
بارض خلا خاليه ماحولـي الوالـي
بس الذيابه تعـاوي فـي مراقبهـا
جلست في مرقبي ابكي على حالـي
من حـرة بالحشـا زادت لواهبهـا
وقامت تكسر بصدري عبرة الجالي*
اللـي قبـل يتِقـي لـد لمضاربهـا
وقمـت اتفكـر بوقتـي اول وتالـي
وشلون عقب الصفا شانت مشاربهـا
طاوعت ثنتيـن والثنتيـن غربالـي
استاهل اللي حصل لي من مصايبهـا
يامن يوصل لابوجـراح* مرسالـي
انا على العهد احارب من تحاربهـا
لغبت عني تكدر خاطـري السالـي
لغابت الشمـس ماتنفـع كواكبهـا
دامك رفيقـي ورب البيـت مابالـي
اضرب على الكايده مانـي بهايبهـا
يالله طلبتك ودمـع العيـن همالـي
اغفر ذنوبي قبـل تِنشـب مخالبهـا
احمد بن عبدالرحمن العريفي
(نديم المجره)
|