قبل الظلام وتوها الشمس غايبه
وفيضت في عالي روابيه عبرتي
وكثرت على قلب المعنّا مصايبه
تذكرت مَن نفسي تمنى مودته
لا القلب ساليها ولا النفس طايبه
لولا غلا ذكراه ما ارخصت دمعتي
لو كان عيني بازرق الدمع رايبه
هذا المكان اللي جمعنا وضمنا
وهناك حاكتني وهي تقل هايبه
هذاك ماقفها وهذاك ماقفي
يوم اشرت بالراس وارخت ذوايبه
لا عاد يومٍ عقب الأبعاد شفتها
تجدد الجرح القديم بسبايبه
من عقب ماني فاكر إني نسيتها
أول شرارة حب شبت لهايبه
حفرت قبر الحب في وسط ضامري
من عقب ماهي بالياتٍ نصايبه
قالوا ملكها الغير مالك ومالها
برقٍ بعيد ولا تحوشك سحايبه
يكفيك دورٍ فات بينك وبينها
جنّب وخل الحب واترك طلايبه
جروحك مع الأيام تشفا وتنتهي
وحبٍ بليّا ساس تكثر نشايبه
قلت اتركوني هرجكم ما يسرني
والميت ما تحييه دمعة قرايبه
والنار ما تحرق سوى اللي يدوسها
جرحي وانا ابخص في دواه وطبايبه
إن كان روحي عقب الافراق شيبت
سود الليالي عقب الأقمار شايبه
ولو كان يدرون الجماعه بقصتي
محدٍ عذل روح من الوجد ذايبه
أول معرفه بين عيني وعينها
كلام عينٍ لعين نظرات صايبه
العشق كان لغيرها لين شفتها
ومن شفتها نفسي من البيض طايبه
بالغصب فرت موجة القلب يمها
بالغصب قلبي طاع وانكر حبايبه
قعدت اماري وافتخر في جمالها
واقول هذا الزين شوفوا عجايبه
انا اندفعت وعشت في جو عاطفي
انا بنيت احلام وآمال خايبه
انا مع الأيام تكبر مصايبي
هذيك اعدلها وهذيك عايبه
لو كان حرماني على الناس ينشكا
شكيت مير الناس ما هي بثايبه
اشكي على اللي قادر انه يحلها
يلهمني السلوان في كل نايبه
واصبر واخبي في حشا الصدر علتي
واظن تالي الصبر تحمد عقايبه
واحبها في صمت واخفي مشاعري
وابكي الى دار الشمال بهبايبه
ولا بد ما عقب التفاريق نلتقي
انا وانت يا حبٍ دفعنا ضرايبه