نومك طرب وأنا بنومـي هواجيـس= ما ساهرك بالليـل كثـر الهمومـي
أسهر ليا نامـت عيـون الهداريـس =وبالليل أراعي ساهـرات النجومـي
قالوا جهلت وقلت جهـلٍ بـلا قيـس =الجاهل اللي مـا يعـرف اليمومـي
أشـوف عـدلات الليالـي مقابيـس =ولحدٍ مـن الدنيـا عظامـه سلومـي
تضحك وتخفي لك خفـى الهناديـس =تفطـر لهـا يـومٍ ويـومٍ تصومـي
إعمل وتلقى وإفهـم العلـم بالقيـس =دنيـاك لـو زانـت تراهـا نقومـي
والعز فـوق معسكـرات السواديـس =ليا قصدت اللي بالأشيـاء رحومـي
قـبٍ تنـازى بالنشامـا كـراديـس =والطيـر فـي روجاتهنـه يحومـي
ليا توافـق مشـور السـوء وإبليـس =تبـر منـه وعـز ربـي يـدومـي
بالليل أصالـي حاميـات المحاميـس =والصبـح ألاوي كـل قبـاً قحومـي
أربع سنين ودمـع عينـي أماريـس =والعين تسهـر كـن فيهـا هزومـي
وليا ركبـت معالجـات المضاريـس =يبرد علـى قلبـي لهيـب السمومـي
إن جن بنا مثـل النعـام الأماريـس =لا خف عجلٍ مع رقـاق الحزومـي
أستلحـق اللـي يطلبـون النواميـس =اللي من الأقصين وأدنـى اللحومـي
وإن جن بالميـدان مثـل الدواويـس =وطار الغطا عن قانيـات الرقومـي
عـرجٍ بأهلهـن كنهـن القرانيـس =على الطريح مصوبـراتٍ كظومـي
وليا سمك عـج الرمـك بالملابيـس =المسعد اللـي حـظ ربعـه يقومـي
صوابنـا بالميـل عمـقٍ ليـا قيـس= وطريحنا فـي مثبـره مـا يقومـي
ولا خير في كثر الحكـي والتماليـس =هرجٍ بلا فعـل يجـي بـه وهومـي
لومي على اللـي ينقلـون العبابيـس =وأهل الفرنج وكـل رامـي لحومـي
من لا يديس الرأي من قبل ما ديـس =عليـه داسـوه العيـال القـرومـي
ومن لا يقلط شذرة السيـف والكيـس =يبـدي عليـه مـن الليالـي ثلومـي
والقصر ما يصلح على غير تأسيـس =ومـن لا تعلـم مـا تفيـد العلومي
ومن لا خذا الدنيـا بميـزٍ وتقييـس =مثـل الـذي يصبـح بليـلٍ يعومـي
كـلّ القلـم مـن كتبنـا للقراطيـس =وإركابنا من كثـر الأقـران تومـي
للشيخ من يعطي الفقـارى المفاليـس =يبـدّل السـاعـه بـعـزٍ يقـومـي
والحـر لا دبـت عليـه النواميـس =يشهـر وعـن دار المذلـة يشومـي
وليا إكترب من بعض الأشياء نسانيس =إعـزم ولابـد الفـرج بالعـزومـي
باب الفرج يلبّسك نظيـف الملابيـس =ينجيـك بأيـام الكـرب والزحومـي
أوجس بقلبـي مثـل دق النحاحيـس= الله يلـوم اللـي لحـالـي يلـومـي
يجلى صدى قلبي ضبيح المهاريـس =لا قـام شـراب القهـاوي يعومـي
ودلالٍ فـوق النـار دايـم مجاليـس =إكرامهـن حـقٍ عليـنـا لـزومـي
من صنعة الصبة وخمس التخاميـس =بريـةٍ يعمـل بهـا كــل يـومـي
وبهارهـن هيـلٍ بليـا حواسـيـس =كيـفٍ يعـدى للنشامـا القـرومـي
عـدّه لحمـاي العيـاد المـراويـس =وألا الحصان اللـي بقينـه يهومـي
حتى يزيـن لنـا المثـل والتوانيـس =والكيف طاب لمـن يفـك القحومـي
وصلاة ربي عـد رمـل الطعاميـس =على شفيـع الخلـق يـوم اللمومـي
قرأتها هكذا واسف للتعديل