/
الا ياوجودي ليت قلبي بـدون احسـاس
على شان لاجـات المحسـات ماتكويـه
اقضّي حياتي داله مثـل بعـض النـاس
واريّـح ضميـر يشكـي الهـم ويعانيـه
طوتنا الليالـي طيـة الكـف للقرطـاس
ورمتنا بسهـم لاجـرح خاطـر يدميـه
لبسنا لها بالصبر والحلـم درع وطـاس
لكن ماكتب للعبد فـي اللـوح مايخطيـه
ومهما شكينـا الهـم والا بكينـا البـاس
تراخى حبال العـزم والـراس مانرخيـه
نعيش وكرامـة روسنـا مالهـا مسّـاس
ونمـوت وخفانـا للمخاليـق مانبـديـه
ولانرخـص الوافـي ولانغلـي البـلاس
ولانتبـع الجاهـل بممشـاه ونجـاريـه
ولاما انهزع وقت الشدايـد ردي السـاس
رسينـا بعـزم قـوة الغـدر ماتثنـيـه
خذينا مع اهل الطيب واهل الوفا مرواس
ورجينا وحققنـا مـع الوقـت مانرجيـه
وعرفنا الذهب لو يحترق مايعود نحـاس
وعرفنا النحـاس الله لاعـاده وطاريـه
وبذرنا الجمايل في الرجاجيل والانجـاس
الانجـاس تفشـل والكفـو دينـه يوفّيـه
وبعض العدا حتى عداوتك لـه نومـاس
لايجحـد ولايظلـم ولايثـلـم معـاديـه
لكن خصمة اللاش انتقاص وحرج وافلاس
لاينطحك ياخذ حـق صايـب ولايعطيـه
تعـوذ منـه كمـا تعـوذ مـن الخنـاس
ولاعديت عدوانك على الناس لا تطريـه
ولـم الروابـع كانهـا للرجـل مقيـاس
هي اللي تعلّـي منزلـه فـوق وتوطيـه
لاطابت تلبسه الفخـر والجميـل لبـاس
ولاما تردت... في مهاوي الردى ترديـه
وذي حكمة الله يوم حط العبـاد اجنـاس
احد يرخصه طبعه واحد شيمتـه تغليـه
ومن راقب افعال العرب صابه الوسواس
ومن صد لايامـن سهـوم القفـا ترميـه
ولاواهني من كان قلبه بـدون احسـاس
على شان لاجـات المحسـات ماتكويـه
|