[يد النجر]

المشاركة الأصلية كتبت بواسطة رندلا

السلام عليكم ورحمة الله وبركاته

اتمنى من كل شخص له خبره يعطينا رايه في اي افضل الاحياء في الرياض اقصد الاحياء الجديده

يعني فيه حي الواحه وحي غرناطه (الشهداء) وحي الحمراء وحي اشبيليا وحي الفلاح وحي قرطبه وحي التعاون وحي المغرزات وحي النزهة

اي هذه الاحياء افضل ام انها متساويه في الافضليه اذا حب الشخص يسكن

هل هي مثل بعض ام حي افضل من حي وايش مميزات كل حي عن الثاني

اتمنى من كل شخص له خبره يعطينا من خبرته

ولكم جزيل شكري وامتناني وجزاكم الله كل خير ووفقنا واياكم لكل خير

السلام عليكم ورحمة الله وبركاته ..

رب اشرح لى صدرى ويسر لى أمرى واحلل عقدة من لساني يفقهوا قولى.

أختي الكريمة .. اسمحي لي بالإضافة في الموضوع من واقع خبرة بسيطة ..

اللي فهمته منك إنك تبين الواحة .. وهي المنطقه اللي مجاورة لقصور العويضه .. لكن غاليه عليك مثل ما تقولين ..

طيب نجي للأحياء اللي وضعتيها في الخيارات عندك .. ونقول بعد الإستعانه بالله ..

وحي غرناطه (الشهداء) وحي الحمراء وحي اشبيليا وحي الفلاح وحي قرطبه وحي التعاون

هذي كلها أحياء متجاورة ..

حي غرناطة .. كان يسمى غرناطة الشرقيه وغرناطة الغربية .. الحين الشرقية تسمى غرناطه فقط .. والغربية تسمى الشهداء ..
انا ساكن في الشرقية الان .. الحي لا يعلى عليه ولله الحمد .. شوارع فسيحة .. 20 و 30
كل الخدمات متوفرة .. فيها مستوصف في منتصف الحي .. مدراس عيال ابتدائي ومتوسط
مجمع البنات الان يبنى في في وسط الحي .
احسن مافي الحي مداخله ومخارجة وقربه من الشوارع الرئيسة .. خالد بن الوليد .. مخرج 9 وطريق الملك عبدالله مخرج 10
مشكلة وحده في الحي من وجهة نظري لكنها مؤقته باذن الله .. وهي الصرف الصحي .. ماهوب متوفر ..
لكن الان لهم تقريبا 6 اشهر يعملون فيها وأوشك الحي على الانتهاء ..
الان ميزة أخرى اضافيه للحي .. اقامة جامع من أروع مايكون وهو جامع ابو عبدالله اللحيدان وإمامه الشيخ تركي الغامدي .
دوريات الأمن ما تكاد تخرج من الحي ابدا .

حي الشهداء . ينطبق عليه ما ينطبق على حي غرناطة الشرقيه تماما .. لان ما يفصل بينهم الا شارع خالد بن الوليد فقط .
بس فيه ميزة وعيب في آن واحد ..
وجود جامع الشيخ فهد الدخيل رحمه الله .. ميزته من ناحية وجود جامع للجمعة والعيد يتسع لعدد مهول من المصلين
امامه الشيخ ياسر الدوسري حفظه الله .. صوته ندي جدا .. يأمه الناس من كل ارجاء الرياض في رمضان .
السلبية هي . ولا اقصد بها سلبييه من ناحية الدين .. لا وربي .. لكن من مفهوم أهل العقار ..
مسجد الدخيل دائم يكون فيه دروس ومحاضرات ودائم يأم الناس المسجد على شان الصلاة خلف الشيخ الدوسري وهو ا يسبب ربكة داخل الحي .. واذا سكنتي قريب من السجد ممكن اي واحد من المصلين يوقف سيارته قدام باب البيت .
ايجابية اخرى .. الشيخ ياسر يدعي لسكان الحي في صلاة اتراويح في رمضان .. لانه عارف انهم يتعبون في الشهر هذا ..

اشبيلة .. هو واليرموك .. مشكلته كثرة السرقات وهذا ماهوب خافي على اللي ساكنين في المنطقه ..

التعاون .. الحي طيب وجديد .. مشكلته الوحيده .. انه مرتفع شوي .. وفيه مناطق تميل للميلان قليلا وقت المطر يصير شويه مشاكل .
ينطبق على الحي ما ينطبق على الشهداء من وجود مسجد الشيخ حمد القاضي رحمه الله .. وإمام المسجد الشيخ ناصر القطامي .. الصلاة عند القطامي .. مثل يوم الجمعة في كل الايام بدون مبالغه وخاصة المغرب والعشاء ..
الحي قريب من المخارج 5 و6 وطريق الملك فهد ..
مدري عن الحي من ناحية توافر المدارس
شوارع الحي شوي صغيرة مقارنه بحي الشهداء وغرناطة ..

قرطبة .. جنب غرناطة بالضبط .. يعيب على الحي قلة المداخل والمخارج لنفس الحي ..
شوارعه طيبة .. الحي لم يبنى تماما حتى الان .. يعني فيه اراضي بيضاء كثيرة ..

حي الحمراء .. اللي هو ينقال له حي الدكاتره ..
انا في نظري المتواضع .. بعد اسواق مصلحة المعاشات انضرب الحي في مقتل .. رغم ارتفاع اسعاره
لان راح تنزحم المنطقه هناك بشكل خيالي وخاصة ان شارع خالد بن الوليد يالله مستحمل الضغط عليه الان

نسيت ملاحظه مهمه تنطبق على غرناطة والحمراء والشهداء .. وهي تطوير طريق الامام عبدالله بن سعود من جهة الشرق
حسب مافهمت من اصحاب الاختصاص انه راح يصير مثل شارع التحلية .. وهذا سبب في ارتفاع الاسعار هنا ..

ختاما .. اتمنى ما اكون ثقلت عليكم .. واجوبتي كلها من معرفتي المتواضعه والبسيطة ..
وتبقى كلها وجهة نظر خاصة فيني .. تحتمل الخطا اكثر من الصواب ..

والسلام عليكم ورحمة الله وبركاته ..