[الــــذيــب]

أيـامنا واللــيالي كـم نعـاتبهـا "=" شـبنا وشا بت وعيفـنا بعض الاحوالي

تـاعد مـواعيد والجـاهل مكـذ ّبها "=" واللـّي عرف حدهـا من همهـا سالي

إن اقبلت يـوم ما تصفى مشـاربها "=" تقفـي وتقـبل ومــادامت على حـالي

فـي كل يـوم ٍ تورينا عجـايبـها "=" واليـوم الاول تـراه احسـن من التـالي

أيـام في غـلبهـا وايام نغلـبهـا "=" وأيـام فـيها سـوا الدهـــر ميّـالي

جـربت الايـام مثـلي من يجربهـا "=" تجـريب عـاقل وذاق المــر والحـالي

نضـحك مع الناس والدنيا نلاعبهـا "=" نـمشي مـع الفـي ّ طوع ٍ حيث مامالي

كـم من علوم ٍ وكم آداب نكسبهـا "=" والشـعر مـازون مثقـال ٍ بمثـقـالـي

أعـرف حروف الهجاء بالرمز واكتبها "=" عـاقل ومجنـون حـاوي كل الاشكالي

لـكن حـظي ردي والـروح متعبهـا "=" مافـادني حسـن تأديبي مع امثــالي

إن جيت أبي حاجـة ٍ عزت مطالبـها "=" العـفـو ما واحد ٍ في النـاس يـاوالي

قـوم ٍ إلى جيتـهم رفـت شواربهـا "=" بالضـحك واقلوبـها فيها الـردا كـالي

وقـوم ٍ إلى جيتهـا صكت حـواجبها "=" وأبـدت لي البغض في مقـفاي واقبالي

مـاكني إلا مسـوي حـال مغضـبها "=" والكـل في عشـرته ماكـر ودجـالي

يـاحيف تخفي علـوم ٍ كنت حاسـبها "=" واللـّي على بـالهم كله على بـالي

الجـار جـارفـّي وكم قوم ٍمحاربها "=" وألاهـل واصحابنا والـدون والعــالي

والـروح وش عذرها في ترك واجبها "=" راح الحسب والنسب في جمع الاموالي

نفـسي تبي العـز والحاجات تغصـبها "=" ترمــيبها بين اجـاويد ٍ الانــذالي

المـال يحـيي رجـال ٍ لاحـياتـبـهـا "=" كـا لسيل يحيي الهشيم الدمدم البالي

عـفت المنـازل وروحي يوم اجنبهـا "=" منها غنيـمه وعـنهـا البعد أولالـي

لاخـير في ديـرة ٍ يشقى العزيز ابها "=" يمـشي مع الناس فـي هم ٍ واذلالـي

دار ٍ بـها الخـوف دوم ٍ مايغايبها "=" والجوع فيهـا ومعهـا بعض الاحـوالي

جوعـى سراحينهـا شبعـى ثعالبها "=" الكـلب والهـر يقدم كـل ريبـالـي

عـز الفتـى راس مـاله من مكاسبها "=" يـامرتضي الهون لاعـز ٍ ولامالي

دلـّلت بالروح لـين ارخصت جـانبها "=" وانا نــجــدي عـريب الجد والخـالي

قـوم ٍ تدوس الافاعي مـع عقاربها "=" والها عـزايم تـهد الشامخ العالي

خـل المـنازل وقـل للبيـن يندبها "=" يبـكي عليها بدمع العـين هطـالي

لاتعمر الـدالر والقالات تخـربها "=" بيـع الردي بالخسـاره واشتر الغـالي

ماضـاقت الارض وإنسدت مذاهبا "=" فيهـا السعة والمراجـل والتـفتـالي

دار ٍ بدار ٍ وجـيران ٍ نقــاربها "=" وارض ٍ بأرض ٍ وأطـلا ل ٍ بأطـلالـي

والناس اجـانيب ليننك تصـاحبـها "=" تكـون منهم كما قالوا بالامثـالي

الارض لله نمشـي في منـاكبـها "=" والله قـــدر لنـا أرزاق ٍوآجـالي

حث المطـايا وشـرقها وغـربها "=" وأقطـع بها كـل فج دارس ٍ خـالي

وأطعن نحـور الفيـافي في ترايبها "=" وأبعـد عـن الهم تمسي خالي البالي

لـو مت فـي ديرة ٍ قفرا جـوانبها "=" فيـها لوطي السبـاع العبس مدهالي

أخـير من ديـرة ٍ يجفـاك صـاحبهـا "=" كم ذا الجفـاء والتجافي والتعلالي

دوس المخـاطر ولا تخشـى عواقبها "=" المـوت واحـد وبعد العز يجلالي

إن المنـايا إذا مـدت مخالبـها "=" تـدرك لـو كنت في جـو السماء العالي

الشمس فـي برجـها والغيـم يحجبـها "=" تقفي وتقـبل لها بالعرش مجـدالي

رب السمـوات يا محصي كـواكبـها "=" يامجـري السفن في لجـات الاهوالي

ضـاقت بنـا الارض وأشتبت شبـايبها "=" والغيث محـبوس يامعبـود ياوالي

يالله مـن مــزنة ٍ هـبت هبـايـبها "=" رعـادها كـن له بالبـحر زلزالي

ريـح العوالي مـن المنشى تقالبـها "=" جـذب الدلي من جبا مطوية الجـالي

ديمـومة ٍ سبـلت وأرخت ذوايبـها "=" وأنهـل منهـا غزير الوبل همــالي

تـسقي ديـار ٍ شديد الوقت حـاربها "=" ماعـاد فيهـا لبعض النـاس منزالي

ياجاهـل إسمع تماثيـل ٍ مرتبـها "=" فيهـا معـاني جميـع القـيل والقـالي

يـارب توبـه وروحـي لاتعذ بها "=" يـوم القيـامه إذا مـاضاقت أعمــالي

وأزكى صلاة ٍ على المختار نوهبها "=" شفيـعنا يـوم حـشر ٍ فـيه الاهـوالي