/// فــــاقــــد ويجــبــر لوعــتـه بالــغــنــاوي ///
شبيـت ناري.. والمشاعـر.. قناديـل
.................. بارضٍ قفر..في ليلٍ أدمس..خلاوي
اكتب على وجه البدو..فرحة السيـل
...................دواس ظلما.. والقطاوي.. قـطـاوي
وارسم من عيـون الامل.. للمهابيـل
.................. واهدي..من جنون العقل..للشقاوي
احيان احس إني ..على ضفة النيـل
................. وامسح على ايدين الامل..بالنصاوي
واحيان اغيب عن الوعي..والأبابيل
................. تزرع ورى حدب المحاني..مطاوي
وجلسـت اقالـب دلتي... والمعاميـل
.................واكسرعقارب ساعتي... بالهقـاوي
اسامرنجوم السما..جدي.. وسهيـل
................. جريح وقت...ولا لجرحي ..مـداوي
وياليل .. ماعينت لـي ناس.. ياليـل
.................أقفوا.. وانا بيـن الرجا..والرجـاوي
اقفوا.. وفنجالي .. يجـر المـواويـل
............... لا الحن ياوي لي..ولا الصوت ياوي
واللله مالومه... ولو مال بي حيـل
.............. فاقـد.. ويجبـر لوعته ... بالغـنـاوي
ماعاد تغري ملمسه.. نكهـة الهيـل
...............من ذاق مرَسَم شَفّته..طـاح هـاوي
قبل امس هو فنجال..ضمن الفناجيل
..............واليوم..مالـه بالغلا .. مـن يسـاوي
وياليل ..راح اكثرك..معاد بي حيـل
.............واليا متى..عرش المحبين...خـاوي
ملـيـت اكابر... وانـثـني.. للمقابـيـل
.............أخيل برق....وخافقي ....له ظماوي
قل له يجي دمعه.. وانا اجيه منديـل
............ قل له يجي كانه على الوصل..ناوي
قل له يجي..واوقد له الشوق..قنديل
............والا يجي شوقٍ.. وانا اجيه.. غـاوي
وان كانه اسرج للجفا..صهوة الخيل
............عادي .. تراني قبـل اعرفه.. خـلاوي
:
:
|