ترجّل ياوجع حتى يطيح في حضرتك عمري
مادام اني عجزت املك لحافي مع قفل بابي
أموت بلاسبب وأدري خطاغيري خطاي ادري
أروح بلا عتب وارجع يفّز الكل لعتابي
واصيح وعبرتي منها وضوئي وطهري وعطري
واصلي ركعتين لوجه ربي واقفل اهدابي
وانام واخر طموحاتي عشاي ونومتي بدري
وارفرف لي جناح ابيض يغازل زهوة ثيابي
واوكل للكريم اللي خلقني خالقي امري
واصلي ركعتين الفجر قربه وافتح كتابي
حلمت اني وحلمت اني وحلمت وينتهي صبري
واقوم البس صفا قلبي وضحكي وفيض ترحابي
وأروح واستقبل الدنيا تضيق ويتسع صدري
اضيق وتاسع لغيري وابكي وهذي اسبابي
انا همي خذا نصفي ونصفي هم من صغري
يارب طال بي درب المأسي واتلف اعصابي
يارب من ترك حقد السنين رماح في خصري
تحده لو على حده تراخى ونّوخ ركابي
أثور وطيبتي تبقى اذا شب اكثري عذري
انا مثل الزهر طيب وانا ادرى الناس بشعابي
أشيل ولا ثقل حملي أشيل وينحني ظهري
دخيلك مامعى غيرك شفاي وعزمي وزهابي
يحسدوني على ابسط طموحاتي وهي جسري
لعالم يحتمل حلمي فضولي صدقي اسهابي
هلي واثر القرابه زيف لايرفع ولايثري
هلي لا واحسافه كلمه ماعضها نابي
مشيته والطريق اللي خبرته مو على خبري
هلي والفين كيف؟؟ غدو هم اول اجنابي
انا من عادتي حفظ الكرامه وان خلص عمري
عزاي اني اموت وطيبه الدنيا على بابي
|