الله من عين ليا هود الليل
قامت تهل دموعها من سهرها
اسهر ليا ناموا رخوم الرياجيل
اللي رجالتهم على الله خبرها
وانا همومي وسط قلبي مداهيل
اسهر بها واسبح بغبة بحرها
واعد واحسب لليالي المقابيل
اليا نسيها غافل ما كرها
ما عاصر الدنيا وشاف التهاويل
ولا يوم ميز شمسها من قمرها
يا كل ويرقد منتفخ كنه الفيل
وليا شاف له سفرة وليمه حضرها
وانا حياتي كلبوها غرابيل
ومشاكل من عدها ما حصرها
وليا شكيت اشكي على جيد الحيل
اللي كسر صلب العظام وجبرها
يقطعك دنيا كلبوها عراقيل
ترمي على النفس العزيزه قشرها
ما تاسم الا في الرجال الحلاحيل
بيض الوجيه مكرمة من خطرها
كم واحد منها عظامه مناحيل
لقت له الدنيا مدابر ظهرها
عام ورى عام وجيل بعد جيل
وشيوخ قوم ما بقي غار اثرها
ومجالس فيها دلال ومعاميل
صدت ورى البيبان محدٍ سبرها
عقب الحطب والنار والبن والهيل
اليوم يارثها بخيل هجرها
ويارايد ابعطيك للعلم تفصيل
وارسم لك الاهداف واعرف قطرها
قول بلا معنى يجيله عراقيل
وقوم بلا عراف يعمى بصرها
والحنظله لو هي على جاري السيل
ينقص حلاوتها ويكثر مررها
ومجالس الانذال والقال والقيل
مثل السهوم اللي سريع خطرها
انشد عن الاجواد ذباحة الحيل
واجلس مجالسها وسير ديرها
والنذل لا يلقى علانا مداخيل
وسود اليالي لا تجي في نحرها
ووصل حبال مقطعين المواصيل
لين الليالي البيض يطلع قمرها
وخلك مع أصحابك بعيد المناويل
لا تبدي أسرارك لمن يختبرها
ترى أصحاب اليوم قوم حناشيل
ما عاد نعرف صدقها من بورها
اخذ الصحيح وكب عنك التعاذيل
نصيحة من والد لك سطرها
تجارب ما هي هروج وتماثيل
حكمة حكيم قالها واختصرها
الشاعر / مساعد بن سعيد الهذلي