الحزن في صوتك ازعج ساكنـي
لين صار الكون من حولي حزين
غصب عني حزن صوتك هاجني
لين خلَّى عاصي المعنـى يليـن
وامتثل حرف القصيـد وعادنـي
وانسكب حزنك على شِعري حنين
شِلت أنا صوتك وحزنك شالنـي
أكْتم الصرخه وينسـاب الأنيـن
شِفت حزنك كيف حزنك شافنـي
كيف داهم خلوتي فـي لحظتيـن
طير أنا مثلك زمانـي ضامنـي
جرّحتني مثلك سيـوف السنيـن
صابك اللى من زمـانٍ صابنـي
في معاليق الحشا جرحه دفيـن
الفرح عقـب الصداقـه هابنـي
خافت البسمه على وجهي تبيـن
طير يا اللّي صوت حْزنك هاضني
الله اللـي ينتصـر للصابريـن