فكر بعقلك لاتغمض جفونك
وأخذ النصيحه جعل ربي يخليك
لاشفت ناسن باللقا يمدحونك
أعرف ترا هرج القفا مايسليك
من يمدحك قدام عينك يخونك
ومن يمدحك بقفاك بالقلب شاريك
أحرص على اللي ضاق صدره بدونك
وأترك صديقن بالسعه دوم باغيك
بعض الصداقه للمصالح يبونك
وأليا خذا المطلوب قل وش يبي فيك
عليك في ربع السعد ينفعونك
لو واحدن منهم عن الناس يغنيك
لاصحت ضايق ! كل بوهم ياعونك
ولاغبت عنهم أرسلوا من يناديك
يرتاح لاشاف الفرح في عيونك
ويضيق لاشاف الحزن في حكاويك
أحدن على سر الصداقه يصونك
وأحدن على سد الصداقه حكى فيك
ربع الرخا لاضقت صعبه يجونك
وربع الشدايد واحدن بس يكفيك
|