[poem font="Simplified Arabic,5,firebrick,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
الحلم - الفتوى
ياشيخ .. جيتك من هواجيس ٍ رحاها تستدير=اسباب حلم ٍ .. يا الهي .. من عواقــبه انجني
ياشيخ .. تكفا .. فسّره يومك بتفسيره خبير=من روعته لا مهتني زادي .. و لا نـــومي هني
ياشيخ .. انا ماني بكافر .. يزبن مشعوذ حقير=ياشيخ جيتك مسلم ٍ ويقول : يارب اهدني
ياشيخ .. ندري مايجي قبل رمضان الاّ القصير=و الموت .. ذيبٍ مادرى وين الرباع .. من الثني
ياشيخ .. انا عندي شدادٍ .. مير .. ماعندي بعير=ما ولف قلبي عالشقا مير الشقا اللي .. ولفني
حلمت يا شيخ بعقالي .. طايح ٍ في وسط بير=والناس حولي نوب تمسكني ونوب تهدني
هجيت ابي الجيره لقيت( الضبع) ياشيخ المجير=وطحت بردى الثنتين يانّي آكله والا أكلني
قلت أعطي الخبت اقدمي .. مثل السروق المستذير=واذا ( جهينه ) عندها صدق الخبر.. صرت(جهني)
وكنّي زبنت ظلال نخله .. باتفيّا من الهجير=والاّ انّي بجذع ٍ يقلْ :- ماغير ( مريم ) هزّني
وشفت النبي ( يوسف ) بيده ( صواع ) مليانٍ شعير=وفي رحل (بنيامين) .. ذيب يقول :- معكم ودّني
وسبعة سنابل وسط حقل براس ضلع اكلته طير=وسنينها اْربعطش .. سبع عجاف .. في سبع ٍ ســني
واصوات رجلين البشر ( للنمل ) بالأمن البشير=( والهدهد ) يدوّر على ( بلقيس ) من بين البني
وكنّي حطبت من السّمر في صيف برده زمهرير=واْخذت لي عودٍ من الحزمه باْشبّه .. شبني
و شوي و الا ّ انّي .. تقل مظلوم في امر ٍ خطير=في ديرةٍ .. واصفى هواها كان .. عج ٍّ سمّني
ديره .. بها ريش النعام يجّرح فراش الحصير=( وسبعين جدر ٍ ) .. ينهدم من شان جدر ٍ ينبني
والله يجيرك شفت رزقي مثل بستان ٍ كبير=في مغرسه طيّب .. ولا ادري ليه .. ماطاب الجَني
( والطيب ) .. ذنبٍ مابعد عذّبه تأنيب الضمير=(والخبث) شاعر كل عذراء جاته تقول :- اهجني
( والشعر ) .. دجال ٍ ينادي : - يافرزدق .. ياجرير=غنوّا معي ( يامن هواه اعزّه ... وأذلني)
( والعين ) .. طرقي تخنقه غربه ويضنيه المسير=( والصدر) .. طفل من الغلا .. يشهق نشيدة موطني
واصغر عيالي يلفظ انفاسه على علبة عصير=المشكله ياشيخ .. قدّامي .. تقلْ .. ماهمني
وكنّ ( الغنى ) .. فارس من الديباج .. وسلاحه حرير=ماله عدوّ الاّ ( الفقر) .. كم جاب قاصيه الدني
( والفقر ) .. عودٍ .. له مرَه مشلوله.. وورع ٍ ضرير=في ارذل العمر .. ان وِقَفْ .. قاصي شموخه منحني
مير افتني ياشيخ .. مين افضل ؟ جزاك الله خير=ماادري الغني ؟ والاّ فقير الحال ؟ .. ياشيخ افتني
هو ( الغني ).. اللي يزكّي بالسنه .. مرّه .. فقير=والاّ ( الفقير ) اللي .. قضى عمره زكاةٍ للغني[/poem]
[poem font="Simplified Arabic,5,green,normal,normal" bkcolor="transparent" bkimage="" border="none,4," type=2 line=0 align=center use=ex num="0,black"]
الــــــــــــــــــــــرد
الحلم - تفسير - الرأي
يا مرحبا .. باللّي يبي الفتوى و موضوعه مثير =الشور عندي .. وإن بغيت أفتيك ( خُذها ) و إنسني
بسـم الله الفرد الصمد .. أبدأ .. و هو ربٍ بصير=و إن كان ما فسّرت حلمك يا الدحيمي فإنعني
خابرك منتاب كافر .. و لا فاجرٍ يتبع غرير=خابرك مسلم .. لكن .. المسلم يضل وينثني
لو ما أنثنى للحق قبل الحق .. فالموقف عسير=في ســـاعةٍ ولت بها التوبه .. و قولة ( دِفِّني )
في سـاعةٍ فيها إمتساوين .. الفقير مع الأمير=ما يلزمك فيها شـداد .. و لا بعـير .. ولا قِني
و الحلم تفسيره على التاويل و المعنى نذير=و البير ما تدري هماجٍ .. ماه .. و إلا ( معدني )
و عقالك ( العقل ) الذي لا راح .. فالدعوى مصير =و العاقل اللي بَصّره ( مولاه ) .. ما قال:- إعمني
و الضبع لا شفته برؤيا .. شفت من مثله كثير=ما تاكله مكبوس والله يا الدحيمي كيف ( نِّي )
أشوى .. تداركت الخطر.. هجّّيت وأنت المستخير=لو ما عليك من الثياب .. الا .. الشـماغ الأردني
و النخله أللّي وارفه .. يا المسـتظل المستنير =مالك و هز جذوعها ؟؟ .. والتمر جنبك منجني
وإن شفت ( يوسف ) فالبلا والموت من مرة الوزير =و الذيب دامه مع ولد يعقوب .. فإسمع .. و إقرني
(( سبع السنابل ما تسر إن كان ما جاها مطير=وأربعطعش وش فودها ؟؟ بتموت من قول : إسقني
والنملْ .. من له غير إبن داوود بالدنيا نصير ؟؟=والهدهد اللي في سبأ .. مرسول .. و الا ما عِني
والزمهرير بحلم صيف إن صاح :- ( يا نار السعير=ويا حاطب الليل إنتبه .. بين الحطب ما ناشني )
( فالعج خيره ) لو تشوف السيف ماحوله جفير =ليتك تكثّر من دعاء .. ( أرجوك ربّي بَدّني )
والريش في حلمك طموح اللي مخاوي له خفير=و الجدر قومٍ في رجاهم .. يا عسـاي و علّني
وأكيد ما طاب الثمر في حوض منكر أو نكير =إغروسها نبتة ( طمع ) .. وفروخها ما تنقني ))
والطيب .. رجلٍ لو يغوله جوع ما جا يستعير=والخبث .. تاجر كل يوم يقول :- فقري هدّني
والشعر .. ديوان العرب .. تاريخ .. لو قلتوا يطير=غنّيت له ( إين الســـبيل الى وصالك ... دلّني )
و العين .. ما يشبع طمعها كود شرٍ مستطير =و الصدر .. مدهالٍ لربعي .. لا منعته .. ردّني
أما الغنى قالوا شموخ و كبرياء و اللي يصير!!=لا مافرقت !! دام الفقر هو ( عَدّني .. ما عَدّني )
والحين .. أنا بأفتيك دامك في سؤالك تستشير=وإن ماعطيتك راي ينفع .. ( بالمسدس ) وإرمني
أطيبهم اللي عزّ نفسه عن كبير وعن صغير=و اللي بلطفه عَمّني .. و اللي بصدره ضَمّني [/poem]