اقتباس:
المشاركة الأصلية كتبت بواسطة خطوات أنثى
بنت ليا منك وقعت تشيلك من القاع شيل
ابرك من وجيه الرجال اللي ليا طحت جفلت
|
السلام عليكم ورحمة الله وبركاته
لولا البكا ماينشرح خاطر ولاينزاح ويل
خل الكدر يطفي سعير الليلــتين اللي خلت ..!!
.
دام العيون اليا اهملت تشفي الغليل من الغليل
الله يبارك في العيون اللي ليا ضقت اهملت ..!!
.
دمعة قهر تثبت لي ان اللي يحبوني قلـــيل
ولاضحكةٍ بوجيه ناسٍ لي تضايقت انكــلت ..!!
.
البارحه يوم الهموم تحط فالصدر وتشيل
والشاهد الله ماحبــست بمحجري دمع وفلت ..!!
.
الدمعه اللي ماتهز صدور ربعــــي لاتسيل
اكنــها مثل الجمر ولايقولون انزلت ..!!
.
اللي وهو مافز لي وده يحملني جميل
اجيه برجولي عشان اشكي له الحال ؟!! اكملت .. ..!!
.
ماكل من شافك قوي يحزن ليا جيته ذليل
الناس ليا من حست بضعف الشجاع استنذلت ..!!
.
بعيونهم ببقى مثل ماللهبوب من النخيل
على كثر ماضامها صفق اللواهيب اعتـــلت ..!!
.
وشلون احس ان العذاب اللي على متني ثقـــيل
وانا ادري ان اللي تصبرني على الحزن وصلت ..!!
.
معشوقتي لاضاق صدري من ليالي الحزن ليل
ياكـــثر ماشربت معي من علقم الحزن وكلت ..!!
.
معشوقتي ما للفرح برجوعها يمي سبيل
الا مثل ما للربيع من الزهور ليا ذبلت ..!!
.
معشوقتي من عمر جيل ومدرسة مليون جيل
معشوقتي ورث السنين اللي تجلت وانجلت ..!!
.
اللي على كثر المصايب كل مافيها جميل
الناس لي كبرت تشين وذيك لي كبرت حلت ..!!
.
لامن تثــنت للهبوب تمــيّل اللي مايميل
وان مالت عقول الخفاف من الرياجيل اثقلت ..!!
.
كن الكلام بثغرها مجرى سبيل للسلسبيل
مسترسله لو ماضميت ولو ضميت استرسلت ..!!
.
تقبل على لون المسا لاجات مفتولة جديل
غصبن عن عيون النسا مايرمشن اليا قبلت ..!!
.
عشقتها لأني من اللي يعشقون المستحيل
صدقتها لأنها لاقالت القول : افعلت ..!!
.
الترفه اللي تنطح الفرِيس وتفك الدخيل
ما فالرجال اللي حمل حزني مثل مااستحملت ..!!
.
لو كل خلق الله ملوا ماتمل وماتميل
لان الرجال بهالزمن قلوا هذيك استرجلت ..!!
.
يوم إن وقفتهم معي من باب مايخدم بخيل
هذيك ما هو بوقفت جنبي .. هذيك هي تبهذلت ..!!
.
خانوا وهي ماخونت عالو وعيت لاتعيل
اتبدلت كل الوجيه وذيك ماتبدلت ..!!
.
لانه ليا عز الرجا ما للخليل الا الخليل
ما قد قرت في محجري قصة عن الحزن وسلت ..!!
.
كن الذي يجري معي يجري على الطرف الكحيل
اليا رضت ترضى عشاني وان تزعلت زعلت ..!!
.
تدوي بخفاقي دوي لين احيت الحلم القتيل
عشق بدويه لبدوي لاجت على البذل ابذلت ..!!
.
معها عرفت اني قوي حتى وانا مافي حيل
واعدها بمية خوي كان الهموم استفحلت ..!!
.
دام الشدايد تكشف بصاحبك معدنه الاصيل
ليت السنين اللي حدتني على الضياع استعجلت ..!!
.
الشدخ اللي تثبت ان اللي يحبوني قليل
ولا ضحكه بوجيه ناس لي تضايقت وانكلت ..!!
.
بنتٍ ليا منك وقعت تشيلك من القاع شيل
ابرك من وجيه الرجال اللي ليا طحت جفلت ..!!