[أليا صهل]

الصاحب اللي حزة الضيق ينساك
انساه من بكره وقفل حسابه .


. مالله على مثله من الناس يحداك
والناس في وقفاتها ماتشابه .


. دور على اللي حزه الضيق يفداك
طبعه وفاه ومايخيب الرجابه .


. واسحب على اللي لا بغى شي يلقاك
واليا بغيته دونك ايصك بابه .


. واصبر على الصاحب ولو يبحث اقصاك
خلك صبور وزيد صدرك رحابه .


. وان زل لاتشكي على الناس ماجاك
عيب الرجل لاشاف شي (ن) حكابه .


. واستسمح الصاحب ليا كثرت اخطاك
لاجاه عذرك يعتبرها دُعابه .


. لازادوا اصحابك يبي يحزن " اعداك "
وان قلوا ابيهنا عدوك شرابه .


. وان جاك نقال الحكي قال انا ابغاك
خلك حريص ولايغرك خطابه .

. بعض البشر بين البشر (داء) فتاك
شوف الرفاقه مع بعضهم مصابه .

. صاحبك لاقه بابتسامة محياك
حتى لو الخاطر تزايد عذابه .


. ورفيق دربك لو مع الوقت يجفاك
منك الوصل يحرج ثواني غيابه