واحبها في صمت واخفي مشاعري . . . .
مريت أنا المطلاع والشوق هزني
قبل الظلام وتوها الشمس غايبه
وفيضت في عالي روابيه عبرتي
وكثرت على القلب المعنى مصايبه
تذكرت من نفسي تمنا مودته
لا القلب ساليها ولا النفس طايبه
لولا غلا ذكراه ما أرخصت دمعتي
لو كان عيني بازرق الدمع رايبه
هذا المكان اللي جمعنا وظمنا
وهنااك حاكتني وهي تقل هايبه
هذاك ماقفها وهذاك ماقفي
يوم اشرت بالراس وأرخت ذوايبه
لاعاد يومن عقب الابعاد شفتها
تجدد الجرح القديم بسبايبه
من عقب ماني فاكر اني نسيتها
أول شراره حب شبت 00لهايبه
حفرت قلب الحب في وسط ضامري
من عقب ماهي بالياتن نصايبه
قالوا ملكها الغير مالك ومالها
برق(ن) مصد ولاتحوشك سحايبه
يكفيك دور(ن) فات بينك وبينها
جنب وخل الحب وأترك00طلايبه
جروحك مع الايام تشفا وتنتهي
وحب بليا ساس تكثر نشايبه
قلت اتركوني هرجكم ما يسرني
والميت ما تحييه دمعات قرايبه
والنار ما تحرق سوى اللي يدوسها
جرحي وانا ابخص في دواه وطبايبه
ان كان روحي عقب الافراق شيبت
سود الليالي عقب الاقمار شايبه
ولو كان يدرون الجماعه بقصتي
محدن عذل روح من الوجد ذايبه
اول معرفه000بعيني وعينها
كلام عن العين والعين صايبه
على جبل لبنان باول مصيفناا
من قبل ابو حمدون تكثر حرايبه
يومن عشاق الهوى تلتقي بهاا
قبل يتولاهاا بشير وكتايبه
العشق كان لغيرهاا لين شفتهاا
ومن شفتها نفسي من البيض طايبه
بالغصب فرت موجه القلب يمهاا
بالغصب قلبي طاع وانكر حبايبه
قعدت اماري وافتخر في جمالهاا
واقول هذا الزين شوفوا عجايبه
أنا اندفعت وعشت في جو عاطفي
انا بنيت أحلام وأمال خايبه
انا مع الايام تكبر مصايبي
هذيك اعدلها وهذيك عايبه
لو كان حرماني على الناس ينشكا
شكيت مير الناس ماهي بثايبه
اشكي على اللي قادر انه يحلهاا
يلهمني السلوان في كل نايبه
واصبر واخبي في حشا الصدر علتي
واظن تالي الصبر تحمد عقايبه
واحبها في صمت واخفي مشاعري
وأبكي ليا دار الشمال بهبايبه
ولابد ماعقب التفاريق نلتقي
انا وانت يا حب(ن) دفعنا ظرايبه
وناقف على المطلاع في نفس ماقفي
قبل الظلام وتوها الشمس 00غايبه
|