[frame="1 80"]
[poem font="Simplified Arabic,5,sienna,bold,italic" bkcolor="transparent" bkimage="" border="none,4," type=2 line=0 align=center use=ex num="0,black"]
بنادق مهجتي معبى فشقها والغلا نيشان = أبطلق روحي في قلب القصيد وأنبض ابياته
أبذبح حزني من أقصى الشعور لأول الأخوان= وأسيل عمره وتشرب عيون العمر دمعاته
وحيد ولامعي الا اخوي بداخلي غفيان =ترفرف ضحكة وأطلق نعاسي لصبح ضحكاته
في بالي يرقد وأدري حزين وشارد وبردان = وانا انثر برده من فوق الخيال وجمر سجاته
ينام وأعقد بعين الأغاني جمرة التحنان = ينام وأعقد بعين البدايه كل نهاياته
يدور القلب تتفتت ظلوعه يطحنه حرمان=يجوع القلب يحضني في جوعي وأكل فتاته
وأطل من الألم أحضن حياة الشارع الولهان = يلملم حسرتي ويكسر وجودي بشوق اضاءاته
تعبت أمليني طعونٍ تصب من خنجر الخلان= تعبت استنزف عيوني دموع لعين طعناته
ياخيي أقعد الدنيا رمت من تحتي النيران = وهذا العمر مايحمل بجوفي الا انكساراته
ياخيي ليه تغيب وليه تتركني وانا شفقان = لقرمٍ يقلب اجبال الهموم بعزة اثباته
أعرفه لاوصل كنه صقر من صفوة الويلان = يكش جلد السما ان شافت مخلابيه وهداته
رجال تربط حزام القبيله وتنفلت شجعان = واخويه يربط رجال القبيله حزام هقواته
كريمٍ ماهو يبني فعايل صيته الديوان = في صدره دلته وهيله وفناجيله وتمراته
اذا كان الكرم حمس (الهلا) في مهجة الضيفان =أخويه من حمس قلبه لضيفه وصب فزعاته
وكم ( تكفى ) انرمت بين البشر ممزوعة الوجدان =اخويه قبل لاترمى عليه يقط نخواته
حزين السيف بكفوف الاوادم طافي ذبلان = بعد مانام دم اللي سقى فعله وومضاته
ياخي اقعد وقعد خضوعي بداخل الشريان = تنام ولا بقى همٍ قطف من دمي غفواته
غريبه شلون يكسرك الغياب ويغلبك النسيان = ودفتر جيتك ياخي طوى من عمري صفحاته
يجيني مادري ولكن اعرفه لاوصل جيعان = قسم وان جاني لانحرني لجوعه تحت خطواته
وصل زوله هذاك اللي وصل مايشبهه انسان =هذاك الي وصل شايل عذاب العمر وآهاته
وجيت الحين ياخيي بعد ماشالتك امتان=بعد ماودهم غسل الجسد عن كل نزواته
أبد لاينغسل هذا الشهم مغسول بالفرسان = أخويه من غسل روح الجسد في طهر نياته
أيا دفان دخيل الله لاتدفن ايا دفان =دخيلك خلني ادفن في بالي جمر بسماته
وأهف بسماته من هذا المكان لاخر الأحزان = وأنا اطحن موته في جوع الكلام واخبز سكاته
أنام شلون لاصار الأخو جايع وانا شبعان =اخوي اللي كسر قلبه لجوعي وجاع لحظاته
اخوي اللي يمزمزني معاليقه اذا عطشان =اخويه اللي ثنى عمره من اجل اطلع مسافاته
يدين القبر ضميني وسط حضن الأخو نعسان =أبرقد دام لي قلبٍ دفن وياه نبضاته
أكيد انه وسط قبره سمع طق الخطاوي الأن = ألا ياليت أنا المدفون وأنا اسمع طق خطواته[/poem][/frame]