.
:فقال محمد أبو دباس :
ياونـة ونيتهـا مـن خـوا الـراس=من لاهـب بالكبـد مثـل السعيـره
ونين من رجله غدت تقـل مقـواس=يون تالـي الليـل يشكـي الجبيـره
ياحمس قلبي حمس بنـن بمحمـاس=وياهشـم قلبـي هشمهـا بالنجيـره
وياوجد حالي يامـلا وجـد غـراس=يوم اثمرة غرسه صفة عنـه بيـره
على ثمر قلبي سرى هجعـة النـاس=متنحـر درب عسـى فيـه خيـره
الله يفكه من بـلا سـوء الأتعـاس=ومن شر عبثـات اللياليـي يجيـره
في ديرة تقطعـت عنـه الأرمـاس=سبعيـن يـوم للركايـب مسـيـره
لاوالله الا حال مـن دونـه اليـاس=حـط البحـر والبـر دون الجزيـره
يالله ياللي رد من عقـب مـا يـاس=يوسف على يعقوب وابصر نظيـره
ترد علي دبـاس يامحصـي النـاس=ياعالـم مـا بالخـفـا والسـريـره
يادباس انا بوصيك عن درب الأدناس=ترى الـذي مثلـك يناظـر مسيـره
عليك بالتقوى تـرى العـز يادبـاس=في طاعـة الله مـا ينجيـك غيـره
هذي ثمان سنين من رحت يادبـاس=لا رسالت جتنـي ولا مـن بريـره
يادباس من عقبك ترى البال محتاس=وعليك دمع العيـن حـرق نظيـره
وعليك كني في دجا الليـل حـراس=اصبح على حيلـي وعينـي سهيـره
اصبح وانا ما بين طاري وهوجـاس=وطـواري تطـري علينـا كثيـره
مثل الوحش قلبي على كف حبـاس=يكفخ كمـا طيـر سبوقـه قصيـره
متحيّر مـن عيلـة البيـت يادبـاس=ارجي ثـواب الله واخشـى المعيـره
اخاف من حكي العدا ثـم الأنجـاس=اهـل الحكايـا الطايلـه والقصيـره
ويقـال خـلا عيلـة عنّـر الـراس=اقفـى وخـلا عيلـة لـه صغيـره
والا فانا يابـوك قطـاع الأرمـاس=مانـي بمثبـور ورجلـه كسـيـره
اصلك لو دونك نبا حمر الأطعـاس=الصلب والصمّان ما هـي عسيـره
مهالـك مـدارك مـابـه اونــاس=الا الثعـل والبـوم تسمـع صفيـره
ياراكب وجننا من الهجـن عرمـاس=فجا النحر يادبـاس حمـرا ظهيـره
متروس الفخذيـن مزبـورة الـراس=كـن الخـلاص عيونهـا مستديـره
تسرح من العوده على نور الأنفـاس=عند الفجـر والليـل مقفـي مريـره
والعصر بالصمّان تسمع لها اضراس=حبل الرسن خطـر تبتـر جريـره
نهـار ثالـث بيـن حمـا والأرواس=واره يمينـك جعلهـا لـك سفيـره
ثـم علـى ساجيـه تقلـب الـراس=تمشي باهلها في البحـور الغزيـره
فيهاالطبيخ وراهي الخبـز يادبـاس=يقعـد خـوا الـراس خنـة خميـره
هي ديرة اللي باغـي كيفـة الـراس=ولا له حد همه مـن النـاس غيـره
هيس ولد هيـس للمواعيـن لحـاس=يفـرح ليـا نيـدي لذبـح النحيـره
ما قفك ذا يادباس ما فيـه نومـاس=يصلـح لقيّـن مهنتـه طـق زيـره
ترى الفـداوي دون وانشـد النـاس=راعيه مـا يذكـر بمـدح وغيـره
ما له سوى طق الحنك منه واليـاس=واليا انقطع خرجه فلا لـه ذخيـره
طلب المعيشه بالحراثـه والأجنـاس=المشترى والبيـع يوصـف وغيـره
قم انهض العيرات مع كـل فـراس=يادبـاس دور خـيّـر تستشـيـره
جدّك وعمانك هـل العـز والبـاس=هـل الموجـب مكمليـن القصيـره
يادباس ما يصبر على البق والحـاس=الا الـذي مالـه بنـجـد عشـيـره
واليوم ما مروي شبـا كـل عبـاس=انت الرجى ياكعـام وجـه المغيـره
عشرين عام كلها ارجيـك يادبـاس=مثل الغريـر اللـي تولـع بطيـره
عدل المناكب هيلـع فـرخ قرنـاس=يمناه فـي لطـم الحبـاري شطيـره
عانق خلوج روحت عقب مـرواس=عنـد العصيـر لبيضهـا مستذيـره
الليل جاها وحال من دونهـا اليـاس=روحها على فرقـاه فـرت فريريـه
يادباس انا يابوك مـا نيـب بـلاس=ميـر ان عيـلات الرفاقـه كثيـره
جنبت وسط السوق وامشي مع الساس=واخذ شوي الحـق واتـرك كثيـره
يادباس لو جبت من دحب الأكيـاس=مختلفـة مـا بـيـن رز ونـيـره
ما لي بهـا ياجعلهـا بالـف قبـاس=او جعلها تذهب ولـو هـي كثيـره
يادباس قلبي كل مـا هـب نسنـاس=شرقيـة هـبـة بقلـبـي سعـيـره
والحال يافرز الوغى مسهـا البـاس=عليـك ياناطـح وجيـه المغـيـره
وغصون قلبي يافتى الجـود يبّـاس=غـاد انـا يابـوك كنـي هشـيـره
من شافنـي يقـول ذا فيـه لسـاس=واللي بـراء حالـي الآهـي خبيـره
لا وعلى من قبـل غـوال الأنفـاس=ومفـارق الدنيـا يجينـا بشـيـره
عسى يطق الباب والنـاس غطـاس=ياوالـي القـدره عليـك تعبـيـره
وصلاة ربي عد مـا هـب نسنـاس=على النبي عـدة حقـوق المطيـره