ترى الزعل موجود مابين الأحباب
وترى العتب بين المواليف عادي
في نظرتك رغم الزعل حب واعتاب
وأنا بعد رغم الزعل معك عادي
أهم شي في قلوبنا شوق وإعجاب
ماأقوى بعادك وانت تكره بعادي
أقسى شعور احباب لاعاشوا أغراب
وأقسى بعد لاكان خلفه عنادي
اللي يبي الفرقا يدور لها اسباب
سهل السبب لاصار ناوي البعادي
والبعد مايغلب إذا الحب غلاب
والوصل مايهزم إذا الشوق زادي
قلبك نظيف ومن كثر طيبته شاب
من طيبته يقدر يغطي العبادي
دام القلوب انظاف في صدور الأحباب
يبقى العتب مابينهم شي عادي
|