قصيدة شاعر الهيلا
الشاعر/ محمدسعيد الذويبي
قيلت القصيده على الهو مباشرة في ملتقى عتيبه 1428هـ فى قناة الساحة مجلس الهيلا
يالله يامنـزل تـبـارك وياسـيـن=
أمـرك مقـدر والمقـدر هـلابـه
اعوذ بإسمك من عيـون الشياطيـن=
ومـن لاذ بالله حصنـه وإتقـابـه
يالله يافـارض صـلاة المصلـيـن=
تجعـل لربعـي دعـوة مستجابـة
ربعـي عتيبـه مكرميـن المجليـن=
وشيوخهـم رمـز الوفـا والمهابـة
يامن خلقت أدم بعلمك مـن الطيـن=
علمـاً تبنـاه الـقـدر واغتنـابـه
وفق لمن يسهر على نصـرة الديـن=
مافيـه دربــاً للهدى إلا مشـابـه
شيخاً على صدقه شهـود وبراهيـن=
حقق لشعبه ما أعلنه فـي خطابـه
فخر الملـوك مرجحيـن الموازيـن=
اللي على نهـج النبـي والصحابـة
عبدالعزيز بيـوم واحـد وخمسيـن =
وحـد وطنـا والجميـع ارتضـابـه
واليوم عبدالله على الراس والعيـن =
مافيـه مرقـى للعـلا إلا رقـابـه
على أيمنه سلطان أميـر البليغيـن =
رايـه ليـا أوحـاه اللبيـب اكتفابـه
عضود أبو متعب ملـوك وسلاطيـن=
يشهد لـه التاريـخ رسـم وكتابـه
تشهـد جاكرتـا وانقـره والفلبيـن=
واحداث سيرلانكـا وغـزه وطابـه
وما بالعراق وما حصل في فلسطيـن=
ومـا قـدم للبنـان يلقـى ثوابـه
واعطا شعوب أفريقيا كل شي زيـن=
وأصلح شعوبـاً فرقتهـا العصابـة
والمغرب عن الطيب ماهم بعيديـن =
يامـا تكفـل بـه ويامـا احتفابـه
واعطا لأروباء كل دعمـاً وتمكيـن =
مما عطا البسنـه شمـوخ ونجابـه
شايل هموم النـاس موتـى وحييـن=
وما من مصاب إلا يخفـف مصابـه
وقال لشعوب أقصا آسيـا لاتخافيـن=
مافيـه داعـي للحـزن والكـأبـة
جاوه وباكستـان والهنـد والصيـن=
واحداث سونامـي وقسـوة عذابـه
ودول الخليج السـت قلبـاً وعينيـن=
في جسـم واحـد مايلـوث جنابـه
في الواجبات وفي الحقوق متساوين =
سيفـاً تجلـت سلتـه مـع نصابـه
عشنا سوا معهم على العسر والليـن=
النهـج واحـد والعوايـد تشـابـه
وقال اليمن وأهله علينـا عزيزيـن=
نشوفهـم بقلوبنـا أهـل وقـرابـه
لبلادنـا تهـوى نفـوس المحبـيـن=
ولها القلوب اتذوب شـوف وصبابـه
واجب علينـا نصـرة المستغيثيـن =
والمسلم اللي مايخيـب الرجـا بـه
هـذي مزايـا ملحقيـن المخليـن =
إليا أختلط عـج الرمـك والضبابـه
شعباً عليه من الشجاعـة نياشيـن =
في ظل أبو متعـب ذار مـن لجابـه
وقبيلة عتيبة علـى العهـد ماضيـن=
أكبر قبيلة حجـم وأصـدق صلابـه
منزالهـا بيـن الجـدي والهلاليـن=
في موقعاً تحمـى جبالـه شعابـه
مابين حرب وعزوة مطيـر ويميـن=
وبين السراة وبين شرقـي غرابـه
وبين الدواسر والبقـوم والقحاطيـن=
وسبيـع والحـرث وكـلاً بـدابـه
علـى الوفـا والاحتـرام متصافيـن=
وكلاً عرف درب الهـدى واهتدابـه
هـذي قبايـل نجـد والكـل داريـن=
من غيرها اللي شرب ماه ورعابـه
تعلـن ولاهـا للملـوك الميامـيـن=
أشبال ابو تركـي وزهـرة شبابـه
قادة وطنـا فـي القدايـم وهالحيـن=
والكـل منهـم نستـظـل بثيـابـه
مـع دولتـاً فـي ظلهـا مستقليـن=
تحكم بشـرع الله وتطبـق كتابـه
عند العناد ترجـع الصـاع صاعيـن=
وعند الرضا ألطف من نسيم السحابه
بأشرف علم تزهاه نخلـة وسيفيـن=
ولفـظ الجلالـة شرفـة واعتلابـه
هـذي بـلاد الحرميـن الشريفيـن=
وهـذا ملكهـا وأمتـه وإنتسـابـه
أرضاً جعلهـا الله مـروج وبساتيـن=
تشرب من ماه الي قراحـاً شرابـه
شعبـاً لميـلات الدهـر مستعديـن=
وكلاً لمـا يعنـاه يحسـب حسابـه
مانـي بالنعـرات رافـع عنـاويـن=
ولا أقمت لجـل العنصريـة خطابـه
حنـا سعودييـن دايـم عزيـزيـن=
لا عنصريـه لا جهـل لا حـرابـه
شعبـاً بتوفـق مـن الله غنيـيـن=
علم وتطـور غيرنـا مـا اهتنابـه
عشنا بأمـان مواطنيـن ومقيميـن=
بأنحاء وطنا اللـي نقـدس ترابـه
وبمناسبـة ماللمزاييـن مـن ديـن=
عند القبايل حان وقـت الوفـا بـه
صاحت عتيبـه وينكـم يالشجيعيـن =
ياصور صرحـاً ماتزعـزع عتابـه
برقا وروق أبناء ثبيـت الأصيليـن =
ومن ثبت أصلـه شرفـه واعتزابـه
الجد ثابت بـن سعـد ثالـث اثنيـن=
نشت هوازن مـن ثنايـا عضابـه
ياعزوتي لو وقعتـي بـدر وحنيـن =
عـادت لعينيهـا رميـت العصابـة
وسارت لجان الملتقى قبل شهريـن =
وكلاً حسـم رايـه وجهـز ركابـه
للملتقى اللي في انتظاره من سنيـن=
اليـوم التاريـخ بـاع وشـرابـه
اربعمية والـف وثمانيـة وعشريـن=
عشرين مـن شـوال تـم اللقابـه
لقاء الشعار اللـي لرؤيـاه شفقيـن=
كـلاً سمـع ذكـره وكـلاً درابـه
رفرف على الصحراء وأنار الميادين=
نـوراً يعـود الفضـل للـي بدابـه
مشعل ولد عبدالعزيز أحمـر العيـن=
ياحظ مـن عنـد اللـزوم التقابـه
عـاد الحيـاة المشرقـة للمزاييـن=
عبر الخليـج ونجـد واللـي نشابـه
وتطلقت في البـر مثـل الشياهيـن=
تشتاق للحـادي وصـوت الربابـه
هذي طرات الروح ياعاشـق الزيـن=
زيناً على العشـاق طـول غيابـه
وإن كان للأبـل الأصايـل مواميـن=
حنا لها أوسع صدر وأكثـر رحابـه
نعطي الجوائز ونصرف لها الملاييـن=
نوصي بصحتهـا وحسـن الرقابـه
والكل منا يعطـي الطـاق طاقيـن =
لو تطلب الي من ورا الصيـن جابـه
يانجـد كـررت القوافـي لبيتـيـن=
تأكيـد والتأكيـد مـابـه غـرابـه
قصيدتـي يانـجـد ون وثمانـيـن=
بيتـاً تراقبهـا عـيـون الذيـابـه
وحنا على اوزان الشعـر مستقليـن=
ناخذ سنى شمسه ونتـرك سرابـه
بإسم الشيوخ المخلصيـن النزيهيـن=
قـادة عتيبـه للشـرف والحزابـه
وإن كان ماسميتهـم هـم مسميـن=
تشهد لهم واحـات نجـد وهضابـه
يامرحبـا بضيوفنـا المحترمـيـن =
اقولهـا عـن عزوتـي بالنيـابـة
ترحيب بالأقصيـن منهـم والأدنيـن=
اللي حضر واللـي يجـي مرحبابـه
نفرش لهـم درب المحبـه رياحيـن=
ودربـاً يضايقهـم علينـا اجتنابـه
قبيلتـي تشكـر جهـود الوفيـيـن =
وتشكر من أثرا الملتقـى واعتنابـه
وتشكر مناديب الصحـف والمذيعيـن=
وعلـم الفضائيـات والـي سمابـه
ومشعل عطا لأهل المزاييـن تأميـن=
في كل عـام تمـوت بـه وتحيابـه
تموت لو عاد الجهـل بيننـا بيـن =
وتحيا إن زرعنا الحب في كل غابـه
حب الوطن مـع دمنـا بالشراييـن =
نعتـز فيـه وعزتـه مـن شبابـه
هل تسمحون بجملتاً بيـن قوسيـن=
تمسح خطأ الشاعر وتثبت صوابـه
يقول أبو متعب على الشعـب ثنتيـن=
دين ووطن مامـن وراهـا طلابـه
عاش الوطن عاش الملك قولوا أمين=
شاعر بدأ بإسـم الوطـن وانتهابـه
وأختم بذكـر اللـي لوجـه ملبيـن=
لاخـاب طلابـه ولا صـك بـابـه
|