[أليا صهل]

يا مرحبـا يا كيف روس المشاكيـل
اهلا هلا بـــاللي يســلي هبـــــاله
يا مرحبا باللي يســوق التعاليــــل
يسوق له قـــاله وانا اســوق قـــاله
أنا أشهد أنه مونســن له غرابيـــل
من وصفه اللي زاد فيه اشتعـــاله
يالله عسى درب السنافي تساهيل
اللي طــرالي يا عرب مــا طــرا له
اللي طرالي ردها في تداااابيــــل
من راسي اللي تو جـوه صفــــاله
ويلي ع المكشات في ديمن وسيـل
في صحصحن والنو كف انهمــاله
والجيب في ظهـره قرومن بهاليـــل
كلن حـــداهم طيب الفـــال فــــــاله
شرواك ياللي مرسلن لي مراسيل
كـــلن من الطنخه منكس عقـــــــاله
تتبعهم اللي كلبوهــا محـــــاميـــل
فيها من حمول الفتى ما بــــــدا له
وبنّــــوا بيوتـــن للنشـــاما مداهيل
واضرم صليب الراس ضوه لحاله
واركى على جال المناره معـــاميل
ذيبن الى جــاه اللــــزوم ارتكــــاله
واللي فزع ينقى نواهي من الحيل
هيف السمين اللي ضري بالجزاله
ذكى ثلاث وصاحبه يطحن الهيــل
عجـــلٍ تشوشك للطنـــاخه فعـــاله
دندون زيــــزومٌ وحــلاّل حلــحيــل
ورث الكــرم من بين عمــه وخـــاله
وأوقد لهــا ضوٍ تهـــول المقــابيــل
شلايخن سَمرن جرومــه جـــــلاله
ومدو على الضيفان شقرالفناجيل
في مدهلن لاهـل الكـرم والشكاله
والعود الازرق فـوق جمرٍ دحاميل
يدور بين أهــل الوفـــاء والجمــاله
وتعطــر المجـــلس بذكـــرٍ وتهليــل
وتدارسوا هدي الحبيب وخصـاله
يحفّـــهم من خالق الخلق تنزيـــل
ملايكــن تشفع بيــومن تهـــــــاله
كلن ينقي من سمـــان الاقاويـــل
كلن يطــيّب للنشـــامى مقــــــاله
ثم قـــام شاعرهم وجر المـــواويل
وابدع طواريقه عــريب الســـلاله
هـذي علـــوم مخيمـن للبهاليـــــل
محلهم لــــو هو قصــا ينعنـــــاله
بدايعــن للـــي يحــب التعاليـــــل
يسلى بها اللي كدر الهم حــــاله
يسوقها بندر كما حادر السيــــل
منقيتن من راس سالي ودالــــــه
يسوق لك سته وعشرين قنــــديل
ماجوب رد القاف لا جــا مجــاله
وختامها صلوا عداد المخاييـــــل
على النبي اللي عساني فـــداله