قالوا علامك صـامت وقلت ياناس
...............................كثر الكلام يقل لاجـله مقامي
الصمت حكمه والحكي مصدر إفلاس
..............................ولقيت في صـمـتي يزيد احترامي
الصمت له معنى وله ذوق وإحساس
..............................مركب نجاتك في بحور الظلامي
ترى الرجل صوره من الـــراس للساس
..............................ثم يتبين جوهـره بالكلامي
إما نطق في كلمة ترفــع الرأس
..............................تضفي على شكله جـديــد الاسامي
وإلا يعود معدنه مـــعــدن نحاس
..............................يرميه سهمه بـعــد ماكان رامي
لا صار عندك من ثمـيـنـات الألماس
..............................خله بــصــدرك لين وقت التمامي
أخاف يطلعلك مــن الناس بلاس
..............................وإلا ســـفــيه ما يرد السلامي
الله خلق خلقه على عــدة أجناس
..............................وكلن يسوقه مذهـبه للأمامي
والله خلق بالطير قمري وقــرناس
..............................ووقت الهدد ما ينغزي بالحـمــامي
لا جال في صدرك من الهم هوجـــــاس
..............................وعينك يحاربـهـا لذيذ المنامي
ونفسك عليله والفـكر صار محتاس
..............................اترك طمان القـــاع وارق السنامي
عليك بالعالي ليا هب نســــناس
..............................يبري الجروح الخــافيه والعظامي
وخلك لربــعـك دايم الدوم نـبراس
..............................وخص القريب وخص ولد العـمامي
خلك لهم في داجـــي الليل مقـباس
..............................ولصاحب أصدق من حقوق الغمـامي
ربعك ذراك ليا لحق راســك البـاس
..............................قدو لهم شربك ولو كنت ضــامي
وخلك لثوب الطيب والعز لبــــاس
..............................واترك دروبٍ تنـــتهي بالحرامي
وفعل الجميل وواجب الضيف نومـاس
..............................ومن لا نفع بالضيق نفعه عدامي
بيت الكريم أبوابه بدون حـــــراس
..............................وبيت البخيل يــعــد مثل الهدامي
كلٍ بها الدنيا نصيبه بـمــقياس
..............................ياخذ نصيبه لو جــفـوه الأنامي